Gipaduso ni National Anti-Poverty Commission (NAPC) Secretary Manny Pacquiao ang mas lig-on nga mga programa sa pabalay ug panginabuhian aron masiguro nga ang matag pamilyang Pilipino adunay maayong puy-anan ug lig-on nga panginabuhian.
Mao kini ang panawagan sa opisyal sa iyang pagtambong sa Mindanao Development Forum 2026 sa Davao City, diin iyang gipasiugda ang kamahinungdanon sa pagtubag sa mga nag-unang panginahanglan sa mga komunidad.
Matod ni Pacquiao, base usab sa iyang kaugalingong kasinatian kaniadto, lisod kaayo ang adlaw-adlaw nga kabalaka ug kawalay kasigurohan kon aduna bay makaon o kapuy-an.
Busa, tumong niya nga maluwas ang iyang mga kababayan gikan sa maong matang sa kalisod.
Padayon usab nga gipalig-on ang panag-uban sa nagkadaiyang ahensya ug sektor aron masiguro nga dali rang maangkon sa katawhan ang mga serbisyo nga makahatag og lig-on nga pundasyon alang sa ilang panginabuhi.
Tumong sa maong mga lakang nga mahatagan ang mga Pilipino og desente nga puy-anan ug igong kita aron hingpit silang makabangon gikan sa kalisod ug kakabos.
