Misasad sa bag-ong record-low nga ₱P64.17 kada US dollar ang bili sa piso kaniadtong Martes, Oktubre 27, 2026 walo ka adlaw human milapas sa ₱63 kada dolyar, tungod sa mga kabalaka sa ekonomiya ug pressure sa global market.
Base sa Bankers Association of the Philippines, mikunhod og 22 sentimos ang piso gikan sa miaging closing nga ₱63.95. Miabot pa kini sa ₱64.20 atol sa trading session, samtang misaka ang trading volume ngadto sa 1.7 bilyong dolyar.
Sumala sa usa ka currency trader, posibleng muabot ang peso sa lebel nga ₱65 kada dolyar kon magpadayon ang volatility sa merkado. Lakip sa mga hinungdan ang domestic economic concerns ug ang gipaabot nga mas hugot nga monetary policy sa US Federal Reserve.
Dugang pressure ang taas nga presyo sa lana ug inflation. Gipataas sa Bangko Sentral ng Pilipinas ang benchmark interest rate og 50 basis-points ngadto sa 5.5% kaniadtong miaging semana, apan nagpadayon gihapon ang paghinay sa bili sa kwarta sa Pilipinas.
Gibanabana sa BSP nga moabot sa 6.1% ang inflation karong tuiga, layo sa 3-porsyentong target niini. Matud ni BSP Governor Eli Remolona Jr., mosulod lamang ang sentral nga bangko sa foreign exchange market aron mapugngan ang sobra nga pag-usab-usab sa bili sa kuwarta.
Gilauman nga makatabang sa piso ang pagsulod sa dolyar gikan sa remittances sa Nobyembre ug Disyembre, apan mahimong malimitahan ang maong suporta sa kawalay kasigurohan sa pagbangon sa ekonomiya.
