Gipaandam ang mga residente sa Davao City sa posibleng pagbaha ug landslide tungod sa gipaabot nga kasarangan hangtod kusog nga pag-ulan nga dala sa Intertropical Convergence Zone o ITCZ, sumala sa weather forecast sa City Disaster Risk Reduction and Management Office Operations Center (CDRRMO-OPCEN).
Base sa forecast nga giisyu alas 5:00 sa hapon niadtong Oktubre 16, gilauman nga magpabiling madag-umon ang kalangitan sa siyudad, uban ang kalat-kalat nga pag-ulan ug thunderstorms.
Gipahimangnoan ang publiko nga posibleng mosaka ang risgo sa flash flood ug landslide panahon sa kasarangan hangtod usahay kusog nga pag-ulan, ilabina sa mga lugar nga dali ra maapektuhan sa pagbaha ug pagdahili sa yuta.
Samtang, gipaabot ang hinay nga hangin gikan sa nagkalain-laing direksyon, ug gamay ra ang balod sa dagat nga gibanabanang moabot sa 0.6 hangtod 1.2 metros.
Giawhag ang mga residente nga magbantay sa mga opisyal nga weather advisory ug emergency updates, ilabina kon magpadayon ang kusog nga pag-ulan. Ang mga nagpuyo duol sa sapa, suba ug mga bakilid angay nga magmatngon sa posibleng paspas nga pagsaka sa tubig ug pagdahili sa yuta.
