Sikop ang walo ka Chinese nationals ug 10 ka Pilipino atol sa operasyon batok sa gituohang ilegal nga pagmina sa Barangay Mabini, Surigao City niadtong Miyerkules, Oktubre 14.
Sumala kang Police Regional Office-13 Director Brigadier General Rolindo Suguilon, nadakpan ang mga suspek sa usa ka gituohang ilegal nga minahan nga nahimutang sa daplin sa kabukiran sa maong barangay.
Ang walo ka Chinese nationals naggikan sa mga probinsya sa Hunan ug Gansu, lakip ang Guangzhou, China, samtang ang 10 ka Pilipino giila nga mga drayber ug operator sa mga bug-at nga makinarya nga gigamit sa giingong ilegal nga operasyon.
Nakumpiskar usab sa maong lugar ang mga heavy equipment ug uban pang kagamitan nga gibanabanang mokabat sa 153 milyon, 343 mil pesos ang kinatibuk-ang kantidad.
Lakip sa mga narekober ang walo ka dump truck, lima ka payloader, 16 ka truck excavator, walo ka generator set, upat ka improvised sluice machine, usa ka pickup truck ug duha ka compressor.
Nakuha usab sa mga awtoridad ang usa ka Armscor shotgun nga adunay 12 ka bala, duha ka improvised airgun ug nagkalainlaing klase sa lana nga posibleng gigamit sa operasyon.
Sa pagkakaron, anaa na sa kustodiya sa Surigao City Police Station ang mga gidakop alang sa tukmang disposisyon, samtang gitugyan na sa Mines and Geosciences Bureau (MGB) Caraga ang mga nakumpiskang heavy equipment alang sa pormal nga ebalwasyon.
