Nagtuo si kanhing presidential spokesperson Salvador Panelo nga adunay posibleng mopuli sa kandidatura ni Vice President Sara Duterte sa 2028 presidential race kung mapamatud-ang sad-an siya sa impeachment court ug madid-an sa paghawid og pampublikong katungdanan.
Lakip sa iyang gihisgotang posibleng mopuli si Davao City Mayor Sebastian “Baste” Duterte, manghod sa Bise Presidente, ingon man sila Senators Robin Padilla ug Christopher Lawrence “Bong” Go.
Matod ni Panelo, posible usab nga adunay motungha nga “dark horse” o kandidato nga wala gilauman, gikan man sa politika o sa gawas niini.
Gipahayag usab ni Panelo nga nagtuo siyang posibleng modaog si Duterte sa 2028 presidential race kung dili siya ma-convict sa impeachment proceedings. Apan, kon ma-convict siya, matangtang siya sa pagka-Bise Presidente ug dili na mahimong makahupot og public office.
Sa laing bahin, giakusahan ni Panelo ang administrasyong Marcos nga naggamit og pagpangpit-os batok sa mga kaalyado ni Duterte ug sa ubang posibleng presidential contenders. Apan kining mga alegasyon ni Panelo wala pa mapamatud-i.
Pasidaan usab niya nga ang padayon nga tensyon sa politika ug ang giingong pagpanglutos sa mga kaalyado sa Duterte mahimong mosangpot sa mas lapad nga kagubot sa politika.
