Mikunhod ngadto sa 5.3% ang unemployment rate sa nasod kaniadtong Agosto gikan sa 6% niadtong Hulyo, sumala sa Philippine Statistics Authority o PSA.
Katugbang kini sa 2.77 milyon ka Pilipino nga walay trabaho, mas ubos kumpara sa 3.14 milyon niadtong Hulyo.
Adunay usab pagbaba ang underemployment rate ngadto sa 11.9% o 5.90 milyon ka Pilipino nga nanginahanglan pa og dugang oras sa trabaho o laing panginabuhian, gikan sa 12.9% o 6.33 milyon niadtong Hulyo.
Mitaas ngadto sa 94.7% ang employment rate, katugbang sa 49.79 milyon ka Pilipino nga adunay trabaho o panginabuhian niadtong Agosto.
Lakip sa nakatampo sa pagdaghan sa trabaho ang agriculture ug forestry, nga nakadugang og 847,000 ka trabaho, ilabina tungod sa panahon sa pagtanom sa humay ug tubo. Misaka usab ang trabaho sa construction og 390,000 ug sa wholesale ug retail trade og 227,000.
Gamay usab ang gidaghanon sa mga bag-ong job seekers niadtong Agosto nga mokabat sa 897,000, kumpara sa 1.5 milyon niadtong Hulyo.
Bisan pa sa pag-ayo sa labor market kumpara sa Hulyo, mas taas gihapon ang unemployment rate kumpara sa Agosto 2025 nga 3.9%.
Samtang, mikunhod ang employment sa manufacturing ngadto sa 3.16 milyon gikan sa 3.43 milyon niadtong Hulyo, nga nalambigit sa huyang nga global demand, ilabina sa electronics sector.
