Girelieve na sa iyang posisyon isip Disaster Risk Reduction Management o DRRM Officer sa DepEd Region XII ang amahan sa teenager nga giila nga suspek sa pagpamusil sa Banga National High School sa South Cotabato kaniadtong Septiyembre 18, 2026 subay sa pagpahibalo ni Davao de Oro Rep. Maria Carmen Zamora atol sa House plenary discussion sa proposed budget sa DepEd.
Matud ni Zamora, wala pay internal policy ang DepEd kabahin sa pagpanag-iya og armas, apan gikinahanglan nga mosunod ang tanang personnel sa kasamtangang balaod sa hustong pagdumala ug pagtipig niini.
Samtang, gikonsiderar sa gobyerno ang pagdeploy og mga babayeng barangay tanod sa mga eskwelahan isip dugang nga security presence.
Gipangutana ni Akbayan Rep. Percival Cendaña kung unsay administrative ug legal nga responsibilidad sa mga opisyal sa DepEd nga mapakyas sa hustong pagtipig sa ilang armas.
Sumala ni Palace Press Officer Claire Castro, gisugyot na sa DepEd ug Department of the Interior and Local Government ang pagdugang sa security personnel, ug posible nga makapirma sila og memorandum of agreement sa sunod semana.
Nasamokan ug nabalaka na usab si Pangulong Ferdinand Marcos Jr. sa insidente sa Banga, ilabina sa paggamit og armas sa usa ka kabatan-onan batok sa mga tawo sulod sa eskwelahan.
Dugang pa Castro, kinahanglan nga mas palig-onon sa mga ginikanan ang relasyon sa ilang mga anak, samtang ang mga magtutudlo ug school personnel kinahanglan magbansay sa pag-ila sa mga warning signs sa posibleng peligro.
