Nagtuo ang Criminal Investigation and Detection Group nga posibleng modaghan pa ang mga kaso sa gitawag nga “paihi” scheme tungod sa padayong pagsaka sa presyo sa petrolyo sa Pilipinas.
Matud ni CIDG National Capital Region chief Col. John Guiagui, posible nga dili lamang sa Navotas City naglihok ang grupo nga nalambigit sa pagbaligya sa gasolina pinaagi sa maong modus.
Gikanayon ni Guiagui nga gisusi sa CIDG ang posibilidad nga mas lapad pa ang operasyon sa grupo ug adunay uban pang mga kauban nga nalambigit niini.
Sumala pa niya, mahimong mas mokaylap ang maong modus samtang nagpadayon ang pagsaka sa presyo sa petrolyo sa nasud.
Kahinumdoman usab nga adunay tulo ka mga lalaki nga nasikop sa Navotas atol sa surveillance operation sa mga awtoridad.
Narekober gikan sa mga suspek ang usa ka 20,000-liter fuel tanker ug usa ka 40,000-liter fuel tanker nga adunay gibanabanang kantidad nga ₱6.66 milyon.
Gipadayon sa CIDG ang imbestigasyon aron masuta kung adunay laing mga tawo nga nalambigit sa maong operasyon ug kung naglihok usab kini sa ubang lugar.
Samtang, gipahimangnoan ang publiko nga magmatngon sa mga ilegal nga pagbaligya sa petrolyo, ilabina samtang taas ang presyo sa gasolina.
