Posibleng makaapekto sa pipila ka bahin sa National Capital Region (NCR), CALABARZON, ug MIMAROPA ang haze nga mahimong may kalabotan sa nagpadayon nga mga sunog sa Kalimantan, Indonesia, sumala sa Department of Environment and Natural Resources–Environmental Management Bureau o DENR-EMB.
Sa pinakabag-ong air quality monitoring sa EMB-NCR, pipila ka lugar sa Metro Manila ang nakarekord og taas nga lebel sa polusyon sa hangin, lakip ang mga lugar nga nasakop sa kategoryang “very unhealthy.”
Naa sa 150 hangtod 200 ang Air Quality Index o AQI sa mosunod nga mga monitoring station:
- Quezon City — Ateneo
- Malabon
- Mandaluyong
- Manila
- Marikina
- Muntinlupa
- Pasay
- San Juan City
- Taguig
- Valenzuela
Samtang, pinakataas ang natala AQI sa Parañaque City, nga miabot sa lebel nga “acutely unhealthy” o tali sa 201 hangtod 300.
Base sa air quality classification, ang ingon niini nga lebel sa polusyon mahimong adunay dili maayong epekto sa panglawas.
Busa, importante nga limitahan ang dugay nga pagkaladlad sa hugaw nga hangin, ilabina alang sa mga sensitibo o vulnerable nga mga indibidwal.
Padayon usab nga gimonitor sa DENR-EMB ang kalidad sa hangin pinaagi sa mga air quality monitoring station aron matino ang gilapdon sa haze ug ang posibleng epekto niini sa publiko.
Nagpagawas na usab og Air Quality Advisory ang Quezon City government, ilabina alang sa mga sakop sa vulnerable groups sama sa mga bata, senior citizen, mga mabdos, ug mga adunay sakit sa baga o kasingkasing.
Girekomenda kanila ang pagsul-ob og face mask isip dugang nga proteksiyon.
Samtang, giawhag ang publiko nga magpabiling alerto ug kanunay nga mosubay sa mga sunod nga pahibalo sa mga awtoridad bahin sa kalidad sa hangin ug sa uban pang posibleng epekto sa haze.
| via Bombo Ray Ann Martinez
