Gilusad na sa Kagamhanang Lokal sa Davao City uban sa Department of Education ang Dabawenyo DCplinado modules sa mga pribadong tunghaan, diin nag-una ang Holy Child College of Davao niadtong Agosto 13, 2026.
Tumong sa programa nga mapalambo sa mga batan-ong Dabawenyo ang disiplina, respeto ug responsabilidad isip kabahin sa ilang pagkat-on.
Ubos sa City Ordinance No. 0552, Series of 2024, ilakip ang mga module sa mga leksyon sa mga tunghaan.
Una kining gipatuman niadtong 2024 alang sa Grade 6 ug Grade 10 students sa Teodoro L. Palma Gil Elementary School.
Lakip sa mga leksyon ang civic responsibility, pagsunod sa balaod, cultural sensitivity, gender equality, personal discipline, digital ethics, environmental stewardship, financial literacy ug culture of security.
Matod ni HCCD School President Pol Allan D. Leuterio, ang DCplinado dili lamang slogan kondili nagrepresentar sa mga mithi sa Dabawenyo.
Kabahin kini sa mga programa ni Mayor Sebastian Duterte nga naghatag og gibug-aton sa disiplina ug maayong pamatasan sa kabatan-onan. | VIA BOMBO EROS PAJOTA
