Mikabat na sa gibanabanang 300 tonelada ang basura nga nahakot gikan sa Baclaran Estero sa Parañaque City hangtod Martes human sa sunod-sunod nga kusog nga ulan sa Metro Manila.
Kapin 50 ka truck ang napuno sa nakolektang basura, samtang gigamit usab sa mga otoridad ang floating trash boom ug dredger aron tapokon ug kuhaon ang basura gikan sa estero.
Personal nga miadto sa lugar si DPWH Sec. Vince Dizon ug gitawag ang sitwasyon nga usa ka “garbage crisis” tungod sa kadaghan sa basura. Gidugang usab niya ang nabati niya nga nadismaya siya tungod sa basura.
Matud ni Dizon, naanod gikan sa Manila Bay ang daghang basura sa dihang misaka ang tubig tungod sa high tide.
Nasayran usab nga nadaot sa kusog nga balod ang unang trash catchment, samtang temporaryong gitangtang ang ikaduha tungod sa dredging.
Kinahanglan usab nga manaug mismo sa estero ang mga personnel sa DPWH, CENRO ug MMDA aron mano-manong manglimpyo.
Tungod sa hugaw nga tubig ug peligro sa leptospirosis, adunay sanitation workers nga nag-inom og Doxycycline isip proteksyon. | VIA BOMBO EROS PAJOTA
