Gi-awhag ni Pangulong Ferdinand “Bongbong” Marcos Jr. ang Kongreso nga palapdan ang income tax exemption alang sa mga empleyado nga adunay kita nga moabot sa ₱350,000 matag tuig, isip kabahin sa mga gisugyot niyang reporma atol sa iyang ikalimang State of the Nation Address (SONA). Sumala pa sa Pangulo, ang maong lakang nagtumong sa pagpagaan sa pinansyal nga palas-anon sa middle class aron mas dako ang ilang madawat gikan sa ilang hinaguan.
Dugang pa niini, iyang gipadayag ang plano sa administrasyon nga mopaubos usab sa income tax sa ubang wage earners, bisan wala pa kini maghatag og dugang detalye kabahin sa paagi sa pagpatuman niini. Lakip sa iyang mga gisugyot ang paghatag og corporate income tax exemption sa gagmayng mga negosyo ug ang pagpalapad sa tax amnesty alang sa wala mabayring buhis, lakip ang income tax, estate tax, donor’s tax, ug value-added tax (VAT).
Matud pa, ubos sa kasamtangang balaod, exempted sa income tax ang mga empleyado nga adunay kita nga ubos sa ₱250,000 sa usa ka tuig, samtang 20 porsyento nga buhis ang ipahamtang sa kita nga molapas sa maong kantidad. Sa kasamtangan, wala pa malakip sa 52 ka priority bills sa administrasyong Marcos ang pag-amendar sa National Internal Revenue Code, ilabina ang pagtaas sa income tax exemption ceiling.
Kahinumduman, ang panawagan sa Pangulo kabahin sa pagpalapad sa income tax exemption kabahin sa mas lapad nga programa sa administrasyon aron maminusan ang gasto sa mga Pilipino ug mapalambo ang ilang kahimtang sa panginabuhi.
