Gitay-og sa magnitude 7.4 nga linog sa baybayon sa estado sa Chiapas sa Mexico karung adlawa, Hulyo 18, 2026. Sumala sa United States Geological Survey (USGS), nahitabo ang linog duol sa lungsod sa Puerto Madero ug adunay giladmon nga mga 10 kilometro.
Human sa linog, nagpagawas ang U.S. Tsunami Warning System og pasidaan sa posibleng tsunami waves sa mga baybayon sulod sa 300 kilometro gikan sa sentro sa linog.
Sa Guatemala City, kusog nga nabati ang paglinog nga maoy hinungdan sa pagdali og paggawas sa pipila ka mga residente gikan sa ilang mga panimalay.
Sumala sa mga report, nagpatuman usab og evacuation ang mga empleyado sa government offices isip kabahin sa safety protocols.
Nabati usab ang pagtay-og sa El Salvador, diin kasarangan ang kusog sa linog sa kaulohan niini, apan hangtod karon wala pay naitalang dakong kadaot o namatay.
Padayon nga gimonitor sa mga awtoridad ang kahimtang samtang gipadayon ang assessment sa posibleng epekto sa maong linog.
