Naghulga ang Iran nga palapdon niini ang pagharang sa mga nag-unang agianan sa mga energy exports sa Tungang Sidlakan human ipatuman pag-usab sa Estados Unidos ang naval blockade sa mga pantalan niini ug naglunsad og bag-ong serye sa mga pag-atake duol sa Strait of Hormuz.
Nagpasidaan ang Islamic Revolutionary Guard Corps (IRGC) nga ilang sirad-an ang uban pang mga ruta nga gigamit sa pag-eksport sa lana ug uban pang suplay sa enerhiya nga gipahimuslan sa U.S.A ug sa mga kaalyado niini.
Samtang, gikanayon sa militar sa Estados Unidos nga nagpahigayon kini og pito ka oras nga airstrike sa palibot sa Strait of Hormuz ug sa mga baybayon sa Iran.
Gipasanginlan usab sa US ang Iran nga responsable sa pag-atake sa pito ka commercial ships niaging semana nga misangpot sa pagkamatay ug pagka angol sa pipila ka mga tripulante.
Sumala pa sa Iran nga mahimo nilang gamiton ang mga kaalyado nga Houthi rebels sa Yemen aron pugngan ang pag-agi sa mga barko sa Bab el-Mandeb, usa usab ka hinungdanong ruta nga giagian sa lana ug uban pang mga baligya nga nagdugtong sa Red Sea ug Gulf of Aden.
Una nang nagpahimangno ang usa ka hataas nga opisyal sa Houthi nga mahimo nilang sirad-an ang Bab el-Mandeb kung magpadayon ang mga pag-atake sa Saudi Arabia sa Yemen.
Matud usab ni U.S. President Donald Trump nga targeton niya ang mga pasilidad sa enerhiya, mga power plant, ug mga tulay sa Iran kon magpadayon kini sa pagdumili sa paghunong sa iyang nuclear program.
