Gibarugan ni Sen. Bong Go nga magpabilin siya sa minority bloc sa Senado, bisan og mag-inusara na lamang siya o aduna pay makauban.
Sumala pa kaniya, prinsipyo, pagsalig ug baruganan ang iyang gihuptan taliwala sa pagbag-o sa liderato sa Senado.
Kini ang pahayag sa senador human sa pormal nga pagpahimutang sa bag-ong Senate Majority niadtong Miyerkules, Hunyo 17.
Gipamugos ni Go, panahon na aron tutukan ang tinuod nga serbisyo alang sa katawhan, ilabi na nga pila ka semana ang nausik sa gubot ug daw “circus” nga sitwasyon sa sulod sa Senado.
Subling nanawagan si Go sa iyang mga kaubanan sa gobyerno nga unahon ang kaayuhan sa mga Pilipino, partikular na ang mga nakasinati og krisis.
Gipasalamatan usab niini si Sen. Alan Peter Cayetano ug ang uban pa niyang mga kaubanan sa minority bloc gumikan sa lig-on nga baruganan ug sakripisyo.
