Hugot nga gilimod sa Society of Divine Word (SVD) ug sa Arnold Janssen Kalinga Foundation ang mga alegasyon batok kang Flaviano Villanueva o mas nailhan nga Father Flavie Villanueva kalabot sa giingong pagdawat og maleta nga adunay kwarta nga konektado sa imbestigasyon sa flood control projects.
Sa ilang pahayag, giingon sa SVD nga walay kamatuoran ang maong mga sumbong batok sa pari nga nailhan usab isip recipient sa Ramon Magsaysay Award tungod sa iyang pagtabang sa mga pamilya sa mga biktima sa extrajudicial killings o EJK.
Gipahibalo usab sa kongregasyon nga nagsugod na sila sa legal nga mga lakang batok sa mga responsable sa pagpakaylap sa giingong sayop nga impormasyon.
Mitumaw ang alegasyon human sa testimonya sa usa sa 18 ka giingong kanhing miyembro sa Philippine Marines atol sa pagdungog sa Senate Blue Ribbon Committee nga gipangulohan sa kampo ni Senador Alan Peter Cayetano.
Gibutyag sa maong testigo nga personal niyang gidala ang usa ka sobre nga adunay kuwarta ngadto kang Villanueva sa usa ka simbahan sa daplin sa Mindanao Avenue.
Apan, gipaklaro sa SVD ug sa Kalinga Foundation nga walay simbahan o parokya nga ilang gidumala sa maong lugar. Sa laing pahayag, gikompirma usab sa Diocese of Cubao nga walay SVD parish o simbahan sa Mindanao Avenue.
Matud sa simbahan, ang mga parokya nga gidumala sa SVD sulod sa ilang hurisdiksyon mao ang Sacred Heart Parish Shrine sa Kamuning, Sto. Niño de Violago Quasi-Parish sa E. Rodriguez Avenue, ug ang Diocesan Shrine of Jesus the Divine Word.
Nagpasidaan usab si Bishop Elias Ayuban Jr. batok sa pagkatag sa sayop nga impormasyon.
Gihangyo niini ang publiko nga mahimong magbinantayon ug siguruhong tinuod ug tukma ang impormasyon nga ilang gituohan ug gipakaylap.
Samtang,gibarugan sa SVD ug Kalinga Foundation nga ilang depensahan ang kamatuoran ug papanubagon subay sa balaod ang bisan kinsa nga mapamatud-ang nagpakaylap og sayop nga mga alegasyon batok kang Fr. Villanueva.
