Hingpit nang gibasura sa Sandiganbayan ang duha ka magkabulag nga kaso sa gobyerno nga nagtinguha nga mabawi ang giingong ill-gotten wealth ug coco levy funds nga nalambigit sa pamilya nila Pang. Ferdinand Marcos ug kanhing First Lady Imelda Marcos, ingon man sa pamilya ni Benjamin Romualdez, kini tungod sa dugay na kaayong pagkalangan sa proseso ug mga teknikal nga isyu. Sa resolusyon sa Second Division sa korte, gipaboran lakip na nipanaw nga kanhing senate President Juan Ponce Enrile sa usa ka civil case nga gisang-at pa niadtong 1987.
Gibasura ang kaso tungod sa inordinate delay, diin gibutyag sa korte nga ang dul-an 40 ka tuig nga pagdungog nakalapas na sa katungod sa mga akusado sa paspas nga pagtaral. Gisalikway usab sa korte ang hangyo sa Presidential Commission on Good Government nga buhion pag-usab ang kaso.
Gidawat sa mga mahistrado ang argumento sa depensa nga naapektuhan na ang ilahang abilidad sa pagdepensa tungod sa pagkahanaw sa ebidensya ug pagkamatay sa pipila ka mga saksi sa paglabay sa panahon.
Bisan paman niini, giklaro sa korte nga magpadayon gihapon ang pagdungog sa kaso batok sa ubang nahibilin nga mga akusado. Sa laing desisyon sa Sixth Division, gibasura usab ang kaso nga nagtinguha sa pagkumpiska sa kapin $5 milyon nga giingong dili mapasabot nga mga bahandi ni Benjamin Romualdez ug sa iyang asawa. Gibase sa korte ang desisyon sa prinsipyo sa judicial stability o non-interference, diin dili na mahimong usbon sa Sixth Division ang naunang desisyon sa Fourth Division nga nagpagawas sa maong pondo niadtong 2025.
Gitan-aw usab sa korte nga ang dugay nga pagkalangan sa kaso usa ka timaan nga giabandona na sa estado ang pag-gukod niini. Kahinumduman nga si Benjamin Romualdez mao ang ig-agaw ni Imelda Marcos. Ang duha ka gibasurang kaso kabahin sa serye sa legal nga mga lakang sa gobyerno aron mabawi ang binilyon nga pondo nga giingong nakawkaw sa nakalabay nga administrasyon.
