Posibleng mawagtang ang P226 billion hangtod P232 billion sa ekonomiya sa Pilipinas kung ipatuman ang total deployment ban sa mga Overseas Filipino Workers (OFW) sa Middle East, kini sumala pa ni Department of Economy, Planning, and Development (DEPDev) Secretary Arsenio Balisacan.
Sumala ni Balisacan, posibleng mahitabo kini kung ma-repatriate o mapauli ang kapin kon kulang 550,000 ka Pilipino nga nagtrabaho sa rehiyon.
Matud niya, ang kantidad nga mahanaw sa ekonomiya tugbang kini sa halos 65% sa remittances o kwarta nga gipadala sa Pilipinas gikan sa Middle East.
Tungod niini, dili lamang mga OFW ang maapektuhan kundili lakip usab sa tibuok ekonomiya sa nasod.
Base sa datos sa Department of Foreign Affairs, adunay gibana-banaan nga 2.41 milyon ka Pilipino nga nagtrabaho sa lain-laing nasod sa Middle East.
Ang labing daghan niini ang United Arab Emirates nga adunay kapin kon kulang 975,000 OFW.
Sunod niini mao ang Saudi Arabia nga adunay 813,000, Qatar nga adunay 250,000, ug Kuwait nga adunay 211,000 ka Pilipinong trabahante.
Samtang, adunay kapin kon kulang 31,000 ka OFW sa Israel ug mga 800 ang anaa sa Iran.
Gipasabot ni Balisacan nga bisan unsang lakang nga maglimita sa deployment sa mga OFW sa Middle East mahimong makaapekto og dako sa remittances ug sa ekonomiya sa Pilipinas.
