Gipangandaman na usab ni Alex Eala ang pagsalmot niini sa 2026 Abu Dhabi Open nga mo-arangkada na sa mosunod nga semana sa International Centre sa Zayed Sports City sa Abu Dhabi, United Arab Emirates.
Nagbabay na sa kompetensyon si Eala sa 2026 Philippine Women’s Open sa dihang napildi kini kang Camila Osorio sa Colombia, 4-6, 4-6 sa quarterfinals.
Pagtapos sa dula, nag-practice dayon si Eala sa center court sa Rizal Memorial Tennis Center.
Nagpasalamat usab kini sa mga Pinoy Supporters nga midagsa sa venue aron tan-awon ang iyahang dula.
Naglaum usab si Eala nga magpadayon ang pagsuporta sa mga Pilipino sa tennis, dungan sa panawagan nga suportahan ang mga bagitong tennis players sa nasud nga nangandoy makadula sa hataas nga lebel sa events.
Nagtuo usab kini nga dako ang matabang sa mga major backers aron suportahan ang mga batan-ong atleta nga posibleng mahimong world class tennis players sa mga umaabot nga panahon.
Dili usab sayon ang naagi-an ni Eala una niini naabot ang iyahang estado sa tennis.
Nagbansaybansay kini ug pipila katuig sa Rafael Nadal Academy sa Mallorca, Spain aron mahanas ang iyahang talento kauban ang mga world class coaches ug trainers sa nahisgutang nasud.
