Misaka pag-ayo ang bayad sa kuryente sa mga residential customer sa Davao Light and Power Company (DLPC) karong Enero 2026, human motungha ang bag-ong rate nga moabot na sa ₱11.7187 matag kilowatt-hour (kWh).
Kumpara sa miaging bulan, kapin ₱2.0052/kWh ang nadugang sa bayranan, gikan sa Disyembre nga ₱9.7135/kWh, nga klarong mabatian sa mga panimalay ilabi na kadtong adunay daghang konsumo sa kuryente.
Sumala sa DLPC, usa sa mga nag-unang hinungdan sa pagsaka mao ang mas mahal nga suplay sa kuryente gikan sa Wholesale Electricity Spot Market (WESM). Nisirit ang presyo sa merkado tungod sa pipila ka power plant outages nga natala sa miaging bulan, hinungdan nga mas daghan ang gikuha nga kuryente gikan sa mas mahal nga spot market.
Laing nakatampo sa dugang bayronon mao ang pagpatuman sa bag-ong bayad nga Green Energy Auction Allowance (GEA-All), nga giaprobahan ubos sa Energy Regulatory Commission (ERC) Case No. 2025-127 RC nga gipetsahan Disyembre 26, 2025. Ang maong bayranan kabahin sa programa sa gobyerno nga mosuporta sa paggamit ug pagpalambo sa renewable energy sa nasud.
Ipatuman ang bag-ong residential rate sa mga bayranang madawat gikan Enero 11 hangtod Pebrero 10, 2026, busa gilauman nga makita dayon sa sunod billing cycle ang epekto sa pagsaka sa presyo.
Tungod niini, mipahimangno ang Davao Light sa ilang mga kostumer nga magbantay sa konsumo sa kuryente pinaagi sa energy efficiency measures sama sa pagpalong sa dili gamiton nga appliances, paggamit og energy-saving devices, ug paglikay sa sobra nga konsumo ilabi na sa peak hours.
Gipasiguro usab sa kompanya nga padayon silang nagtan-aw sa kahimtangan sa suplay ug merkado sa kuryente, samtang naningkamot nga mapadayon ang kasaligan nga serbisyo bisan pa sa mga hagit nga ginadala sa pag-usab-usab sa presyo sa enerhiya.
