Subling gipamugos ni US President Donald Trump nga ang pagsakop sa Greenland ang mamahimong makatabang sa Estados Unidos aron makunhuran ang pagsalig niini sa China alang sa mga critical minerals, partikular na ang rare earth elements.
Bisan paman sa problema sa geology sa isla susama sa kakulang sa imprastraktura. Wala pay bisan usa ka minahan sa rare earth nga aktibong nagpadagan sa Greenland, hinungdan nga gikwestyon sa mga experto ang pagkahakog sa Estados Unidos.
Kahinumduman, unang gipahayag ni Trump ang prayoridad nga mangita ug rare earths sa Arctic island sa higayong makuha kini nila gumikan sa pagpahugot sa China sa pag-export ug mga critical minerals sa US, homan sa sunod-sunod nga pagpahamtang ug taripa ni Trump sa nahisgutang nasud.
Bisan paman nga migahin na ang administrasyon ug gatusan ka milyong dolyar alang sa pagmina sa sulod ug gawas sa nasud, subli niining gibuhi ang ideya sa pagkuha sa Greenland gikan sa Denmark isip malungtarong solusyon sa problema sa Amerika.
Nasayran nga gibanabanaang adunay mukabat sa 1.5 milyong tonelada sa rare earths ang isla, apan kadaghanan sa mga proyekto ang anaa sa exploratory stage pa lamang.
Dugang pa niini, ang rare earths sa Greenland ang anaa sa eudialyte rock, usa ka matang sa bato. Kadaghanan sa rare earths sa kalibutan ang nagagikan sa carbonatite deposits kung diin aduna nay epektibong teknolohiya sa pagkuha niini.
Bisan paman sa mga hagit, nagpadayon ang interes sa mga gustong mamuhunan sa plano ni Trump kung diin midoble ang stock sa Critical Metals homan gipahayag sa Amerika ang plano sa pilot plant sa Greenland.
