Gilusad na ni US President Donald Trump ang $1 milyon nga gold card immigration visas alang sa mga adunahan nga langyaw.
Ang maong gold card maghatag sa mga buyer og “direct path” padulong sa Citizenship alang sa tanan nga kwalipikado ug maayo nga nasusi nga mga indibidwal, sumala sa US President.
Unang gi-anunsyo ang Trump Gold Card sa unang bahin sa tuig.
Subay sa opisyal nga website sa maong immigration visa, ang gold card usa ka US visa nga gihatag sa mga nagpakita og kapasidad nga makahatag og “substantial benefit” sa Amerika.
Aron makakuha sa Trump Gold Card, kinahanglan lang moadto sa website sa Trump Gold Card.
Nakalatid sa website ang proseso diin kinahanglan nga magsumite og aplikasyon ug mobayad og non-refundable processing fee sa Department of Homeland Security (DHS) nga $15,000 kon P885,000.
Human sa pag-apply, susihon pag-ayo sa US Citizenship and Immigration Services ang background sa aplikante, ug sa dihang maaprubahan, kinahanglan nga maghatag og kontribusyon nga $1 milyon kon P59 milyon ug mahimong magamit na ang Trump Gold Card sa tanan nga 50 ka estado ug territories sa Amerika, ug makadawat gilayon og US residency sa “record time.”
Ang paglusad sa gold card nahitabo samtang gipakusgan sa US ang ilahang immigration crackdown, lakip na ang pagsaka sa work visa fees ug pagpadeport sa mga undocumented nga mga migrante.
