Balhog karon sa bilangguan ang usa ka pulis human niining gipusil-patay ang iyang kaipon sulod sa ilang panimalay sa Purok 11, Bonifacio Bataan St., Barangay Zone 3, Digos City.
Subay sa imbestigasyon, niuli ang suspek kansa giilang si Patrolman Dinoy, 30 anyos ug kasamtangang nadestino sa Hagonoy Municipal Police Station sa ilang balay kauban ang iyang anak nga babaye nga lango sa makahubog nga ilimnon.
Sa pag-uli sa suspek sa ilang panimalay, nagkalalis matud pa sila sa iyang kaipon nga giilang si Mealjoy Basilgo Lapeña, 30 anyos, usa ka virtual assistant nga miresulta sa kamatayon niini human nga mibunlot ang suspek sa iyang pusil ug gipusil ang biktima sa makadaghang higayon.
Gani, nadamay sab matud pa ang inahan sa biktima kansa nakahiagom sab og samad pinusilan, apan gilayong nadala sa balay tambalanan.
Misulay matud pa sa pagsibat ang suspek, apan naabtan kini rason nga gilayon kining gipansak sa prisohan.
Sa dugang imbestigasyon sa otoridad, narekober ang 10 ka bala pusil nga gikatakdang ipailawom sa ballistics examination.
Kasong homicide ang ipasaka batok sa suspek human sa maong insidente.
