Gibatikos ni Senador Panfilo “Ping” Lacson ang usa ka flood control project sa Arayat, Pampanga, human nga magusab usab ang riverbank mitigation structure sa Candating bisan og bag-o lamang kini giayo ug gigastusan sa gobyerno.
Sumala pa, nga niadtong Hulyo 2025 gikusokuso sa Bagyong Emong ang istruktura bisan pa nga nahuman lamang kini giayo niadtong Hunyo.
Giingon ni Lacson nga ₱20 milyon ang gigahin alang sa proyekto sukad pa 2018, apan napakyas gihapon kini.
Sa iyang privilege speech, gibulgar usab sa senador ang maanomalyang flood control projects sa Bulacan, diin giapil ang duha ka mga gitangnga nga district engineers nga gitumbok nga maoy responsable sa mga anomalya sa 28 ka proyekto ug sa pagbulsa sa pondo.
Matod pa ni Lacson, nga kasagaran sa 40 porsyento ra sa pondo ang tinuod nga nagamit sa proyekto samtang ang sobra, nahulog sa bulsa sa mga opisyal ug politiko.
Samtang, gisalikway ni House Deputy Majority Leader Rep. Arnan Panaligan ang pagkalambigit sa iyahang pangalan sa giingong anomalya sa mga flood control projects sa Oriental Mindoro.
Nahisgutan ang iyang ngalan sa privilege speech ni Lacson bahin sa mga kontrobersyal nga proyekto, apan gipasalig ni Panaligan nga wala siyay kalabutan niini. Iyang gipasabot nga ang maong mga proyekto wala niya giprayoridad ug wala usab siya nagmugna niini, kondili gihatag lamang kini sa ilang distrito pinaagi sa pondo sa gobyerno.
