Usa ka 38-anyos nga babaye sa Australia ang milalin sa usa ka retirement home human ang ilang panagbulag sa iyang long-term partner.
Tungod sa kalisod sa pagpangita og barato nga pinuy-anan sa Melbourne, napadulong kini sa retirement village nga adunay bakanteng unit.
Gihanyagan siya sa iyang iyaan nga puy-an kini ug gilayon siya nga gidawat sa lugar.
Paglabay sa usa ka tuig, gibutyag sa babaye nga kini ang labing maayong desisyon nga iyang nabuhat. Hapsay ug malinawon ang iyang kinabuhi, barato ang arkila, ug nakaayo kini sa iyang mental health.
Sumala pa sa babaye, dili boring hinuon therapeutic ang pagpuyo sa retirement village.
Yano ra ang iyang adlaw-adlaw nga routine, pag-inom og kape, yoga, pagbasa, freelance nga trabaho, ug bingo.
Gipanghambog usab niini ang kabuotan sa iyang mga silingan, ug iyang natun-an nga ang pagkatigulang mahimo diay nga malipayong ug makahuluganon nga bahin sa kinabuhi, bisan pa sa atong edad nga 70s o 80s.
Bisan pa sa mga komento nga batan-on pa kini aron mopuyo sa retirement home, puno siya sa determinasyon sa iyang desisyon ug wala siyay plano nga mobiya sa lugar nga iyang giila na karon nga iyang tinuod nga balay.
