Namatay ang usa ka construction worker human mahulog sa gitukod nga Samal-Davao Bridge sa Purok 2, Barangay Caliclic, Babak District, Island Garden City of Samal (IGACOS).
Ang biktima, 25 anyos, lumad sa Sto. Tomas, Davao del Norte, giingong nagtrabaho sa board pile sa tulay sa dihang nawad-an kini og balanse ug nahulog sa usa ka lungag.
Nahitabo ang insidente pasado alas 9:10 sa buntag niadtong Hulyo 23, 2025. Ang inahan sa biktima, 47 anyos, nagpuyo sa samang lugar, maoy mitaho sa insidente ngadto sa Babak Police Sub-station.
Sa imbestigasyon, nasayran gikan sa foreman ug kauban sa biktima nga nawad-an kini og panimuot ug naangol sa nawong human sa maong pagkahulog.
Dalì siyang gidala sa labing duol nga tambalanan sa Samal Zone, Barangay Peñaplata, IGACOS, Davao del Norte.
Apan, gideklarar siyang dead on arrival (DOA) sa doctor nga mitan-aw kaniya.
Base sa findings sa doktor, ang hinungdan sa iyang kamatayon mao ang acute respiratory failure type 1 nga resulta sa traumatic brain injury.
Padayon ang hugot nga imbestigasyon sa Babak Police Sub-station aron matino kung adunay mga laing rason o kakulang nga nakaamot sa trahedya.
