Pormal nang nanumpa ug opisyal nga milingkod isip bag-ong konsehal sa Davao City si Rodrigo “Rigo” Duterte II sa pag-abli sa ilahang unang regular nga sesyon kagahapong adlawa, Hulyo 1, 2025.
Gawas sa iyang pagka-konsehal, gitudlo usab si Rigo Duterte isip acting vice mayor sa lungsod.
Ang iyang paglingkod sa maong posisyon usa ka kabahin sa mga temporaryo nga lakang sa lokal nga panggamhanan gumikan dili na personal nga makalingkod si kanhi Presidente Rodrigo Roa Duterte, nga midaog isip mayor sa nakalabay nga eleksyon, apan hangtod karon nagpabilin kini sa kustodiya sa International Criminal Court (ICC) sa The Hague, Netherlands.
Sa iyang inaugural speech, nagpasalamat si Rigo Duterte sa pagsalig nga gihatag kaniya sa mga Dabawenyo ug midawat sa katungdanan nga adunay pagkamapaubsanon.
Gipakita niya ang pagkamatinuoron sa iyang tinguha nga magserbisyo sa katawhan ug makigtambayayong sa tanang miyembro sa konseho alang sa kaayohan sa lungsod.
Gibutyag niya ang iyang pagtan-aw sa lig-on nga panaghiusa sa mga Dabawenyo ug ang iyang saad nga ipadayon ang mga programa ug inisyatiba nga maghatod og kalambuan, kalinaw, ug kaayohan sa komunidad.
Lakip sa iyang unang adlaw sa serbisyo mao ang pagdumala sa unang sesyon sa Sangguniang Panlungsod isip presiding officer.
Kagahapon usab pormal nga gibalhin ang regular nga oras sa sesyon, gikan sa buntag ngadto sa ala-1 sa hapon, aron mas mapaayo ang dagan sa mga diskusyon ug desisyon.
Samtang si Mayor Sebastian “Baste” Duterte usab, nagpabilin nga mayor sa lungsod, si Rigo Duterte ang temporaryong nagserbisyo isip acting vice mayor, subay sa mga palisiya sa lokal nga panggamhanan.
Nagpadayon ang panawagan sa bag-ong opisyal sa panaghiusa ug kooperasyon aron mapadayon ang kalinaw ug mapalambo pa ang kahimtang sa dakbayan sa Davao.
