Gipadayag sa City Environment and Natural Resources Office (CENRO) XI nga wala pa maaprubahan ang Implementing Rules and Regulations (IRR) alang sa “No to Single-Use Plastic” Ordinance sa dakbayan sa Davao.
Ang City Ordinance No. 0500-21, nga nailhan usab nga “No to Single-Use Plastics Ordinance,” gi-aprubahan pa kaniadtong Mayo 2021.
Sumala pa ni Engr. Lakandiwa Orcullo, ang hepe sa Environmental Waste Management Division sa CENRO, nga ang technical working group misumite na sa draft sa IRR ngadto sa City Legal Office alang sa review.
Ang maong ordinansa nakalatid sa pagkontrolar sa paggamit ug pagbaligya sa single-use plastics sa mga negosyo ug apil usab sa individual nga paggamit.
Ang mga establisimentong gustong magbaligya og single-use plastic products kinahanglan mobayad og ₱10,000 alang sa “special permit to sell,” samtang ang gustong mag-apod-apod o gamiton kini sa dagkong kantidad (pananglitan: mga okasyon, events) kinahanglan mobayad og ₱5 matag buok aron makakuha og “special permit to distribute.”
Ang mga wala makakuha og permit mahimong makamulta ug posibleng ipasirado ang ilang negosyo.
Ang mga establisimentong nagasalig pa sa paggamit og plastic utensils sama sa cutlery, straw, cup, cup lids, plato, egg trays, hand gloves, ug uban pang single-use plastics, gina-awhag nga mosugod na sa pagbalhin sa laing alternatibo sa dili pa masugdan ang pagpatuman sa IRR.
Ang mga silot sa mga makalapas niini nga ordinansa mao ang mosunod: ₱1,000 o 8 ka oras nga environmental service alang sa unang kalapasan, ₱3,000 o 16 ka oras nga environmental service alang sa ikaduhang kalapasan, ug ₱5,000 ang labing taas nga silot alang sa ikatulong offense o laing pa nga kalapasan.
