Gipahibalo sa City Environment and Natural Resources Office (CENRO) niadtong Huwebes nga 55 porsyento na ang kahumanon sa unang hugna sa bag-ong sanitary landfill nga gitukod aron masolusyonan ang basura sa dakbayan.
Matod ni Engr. Lakandiwa Orcullo, hepe sa Environmental Waste Management Division sa CENRO, ang maong proyekto gibahin sa duha ka hugna, diin ang una niini kasamtangang anaa na sa 55% ang progreso.
Ang bag-ong sanitary landfill nga naglangkob og 6.5 ka ektarya nahimutang daplin lamang sa kasamtangang landfi;; sa basura sa Barangay New Carmen, Tugbok District.
Gisaysay ni Orcullo nga siyam ka ektarya ang gipalit sa dakbayan, apan 6.5 ektarya ra ang gitugot nga pausbawan base sa giya sa Department of Environment and Natural Resources (DENR).
Ang tibuok pondo sa proyekto mokabat og P500 milyon, diin ang una nga hugna gibalor og P340 milyon, samtang ang ikaduhang hugna nga gisugyot sa City Engineer’s Office nagkantidad og P200 milyon.
Gipasiugda usab ni Orcullo ang importansya sa solid waste reduction, nga matod niya lisod na kaayo ang pagpangita og lugar para sa tapunan sa basura.
Dugang pa niya nga lisod gihapon ang pagbutang og Materials Recovery Facility (MRF) sa matag barangay tungod sa kakulang sa luna, labi na sa dakbayan.
Sa 182 ka barangay, 53 lang ang adunay MRF, samtang 116 ang adunay materials recovery stations. Sa bahin sa composting, 96 lamang ka panimalay ug 47 ka barangay ang adunay composting facility.
Aduna man unta plano ang dakbayan nga magtukod og central MRF ug composting facility, apan wala pa kini masugdi tungod kay padayon pa ang trabaho sa landfill.
Sa pagkakaron, gipaningkamotan sa dakbayan nga mapuslan og husto ang kasamtangang landfill tungod kay wala pa’y laing alternatibo.
Gikompirma usab ni Orcullo nga ang solid waste generation sa dakbayan mosaka na og 753 tonelada o 753,000 ka kilo matag adlaw.
