Gisugdan sa City Government sa Davao pinaagi sa City Environment and Natural Resources Office (CENRO) ang pagpanghipos sa mga materyales sa kampanya nga gigamit atol sa piniliay karong tuiga. Ang kalihokan nagsugod niadtong Lunes sa gabii ug nagpadayon pa hangtod karon.
Ang mga nakolektang campaign materials gidala dayon ngadto sa recycling facility aron magamit pag-usab. Pinaagi sa Executive Order No. 6, series of 2025, nga gipagula sa siyudad niadtong Mayo 9, gikasugo ang tanang lokal nga kandidato nga magmugna og ilang kaugalingong mga grupo aron manghipos, mag-reuse, ug mag-recycle sa tanang election paraphernalia lokal man o nasudnon sulod sa tulo ka adlaw, sugod Mayo 13 hangtod 15.
Dugang pa, gibug-aton sa lokal nga kagamhanan ang importansya sa limpyo ug hapsay nga palibot human sa eleksyon. Ang coordinated cleanup effort usa ka paningkamot sa pagpahiuli sa kaanindot sa mga lugar sa siyudad nga nabahaan sa mga poster, streamer, ug uban pang kampanya materials atol sa eleksyon. Gilauman nga pinaagi sa pagkahiusa sa mga kandidato ug ilang mga supporters, malimpyo ang siyudad ug mapromote ang responsableng paggamit sa mga materyales.
