Pagasugdan na sa Commission on Elections (COMELEC) ang nationwide “Operation Baklas” karong adlawa, Pebrero 11, 2025, atol sa pagsugod sa Election Campaign 2025.
Sumala pa ni Atty. Gay Enumerables, ang Assitant Regional Election Director sa Comelec XI, nga pang-baklason sa buhatan ang mga election posters nga wala nahisubay sa saktong kahimutangan, diin pagasugdan kini sa Matina area ning dakbayan sa Davao.
Gikataho sa opisyal nga adunay due process nga ginasunod ang COMELEC diin gipahibalo na usab niini ang mga kandidato nga baklason ang ilahang mga campaign materials, ilabi na kadtong anaa sa mga billboard.
Kalakip na usab sa pagabaklason mao ang mga posters nga adunay patimbaya gikan sa mga kandidato.
Samtang, nahilakip sa gikataknang campaign areas ang susama nga dapit sa BRGY 1 – A basketball court vicinity, ug sa Brgy 4-A diha sa Palma Gil St. gikan sa PTA hangtod corner Camus/Ilustre St.
Kabahin niini, nagpahinumdum usab ang opisyal nga mamahimong itaho sa ilahang buhatan kung adunay mamatikdang vote buying.
Ang susama nga iligal nga kalihukan usa ka paglapas ngadto sa Election Code of the Philippines Section 22 Art. 261 nga adunay katugbang nga silot susama sa pagkadiskwalipika isip kandidto sa umalabot nga election, anaa usab kini katugbang nga fines ug kaso.
