Patay ang labing menos 13 ka mga peacekeeper ug mga sundalo sa nagpadayon nga kagubot sa silangang Congo.
Mao kini ang gitaho sa United Nations ug foreign military sa naasoy nga dapit.
Samtang, milapad ang pwersa sa mga rebelde sa M23 sulod lamang sa miaging semana, ug sa pagkakaron duol sa sidlakang bahin sa siyudad sa Goma ug adunay dili mominos nga 2 ka milyong populasyon, ingon man giisip nga importanteng sentro alang sa seguridad ug mga humanitarian operation sa rehiyon.
Lakip sa mga kaswalti mao ang duha ka South Africa peacekeepers, usa ka Uruguayan Blue Helmet, ug tulo ka Malawian peacekeeper, ingon man pito ka mga sundalo sa South Africa gikan sa Southern African Development Community Mission (SAMIDRC).
Ning bag-o lang mas nigrabe ang kagubot sa nasangpit nga nasud diin nagdala sa peligro sa mga kinabuhi sa sibilyan.
Giakusahan sa mga eksperto sa Congo, Estados Unidos, ug UN ang Rwanda nga nagsuporta sa grupong M23, gikan sa mga etnikong grupo sa Tutsi sa Congo nga mibuwag sa kasundalohan sa Congo kapin sa usa ka dekada ang milabay.
Apan, gipanghimakak sa Rwanda ang mga alegasyon, apan giangkon nga kini adunay mga tropa ug mga sistema sa missile sa silangang Congo alang sa seguridad niini.
Agi’g tubag sa nagkadako nga kapintasan, gi-postpone sa U.N ang Security Council ug magpahigayon og emergency meeting ugmang adlawa Enero 28, 2025.
Samtang, si Kate Hixon, advocacy director alang sa Africa sa Amnesty International US, miingon nga ang mga rebeldeng M23 nagpahimulos sa sitwasyon tungod sa pagbag-o sa administrasyon sa US, nga iyang giingon nga mahimong mosangpot sa dugang nga pagdako sa kapintasan sa rehiyon.
