Gikatakdang mutunol og hinabang ang lokal nga panggamhanan sa Davao ngadto sa mga residente nga naapektohan sa pagbuto sa Mount Kanlaon kaniadtong milabayng adlaw.
Sumala pa ni Davao City Mayor Sebastian Baste Duterte nga kanunay gayud nga gahatag ang LGU sa Davao sa mga residenteng apektado sa unsa mang katalagman sulod o gawas man kini sa siyudad.
Gani, dugang pa niini nga dili kini pamolitika gumikan daan na kining tradisyon og batasan sa LGU-Davao.
Kahinumdumang mibuto ang Bulkang Kanlaon kaniadtong milabayng adlaw kung diin miabot sa kapin 87,000 ka mga residente sa La Carlota, Negros Occidental ang gipapahikling gawas sa six kilometer danger zone sa maong bulkan.
Ning kasamtangan wala pay ensaktong adlaw kung kanus-a kini matunol apan gipasalig ni Mayor Baste nga andam gayud ang siyudad sa pagtabang sa labaw nga nanginahanglan panahon sa mga katalagman.
