Nadismaya si Pangulong Rodrigo Duterte human niining nasayran nga adunay ginahimo sumala pa nga pagmanipula sa QuadComm sa gihimong imbestigasyon sa ‘Reward System’ matud pa sa kanhing administrasyon.
Nasayran nga subay sa gisaysay ni Col. Hector Grijaldo, gitanyagan sumala pa nila Santa Rosa City Rep. Dan Fernandez ug Manila City 6th District Rep. Benny Abante nga mohimo og affidavit batok sa nakalabay nga administrasyon.
Mibalibad sumala pa si Grijaldo sa maong tanyag bisan ang bugti niini ang iyahang pagka heneral.
Gumikan niini, gikanayon sa kanhing pangulo nga mamahimong mapasakahan ug kasong ‘Subornation of Perjury ang duha ka mga magbabalaod gumikan sa pagpamugos sumala pa paghimo og false oath.
Samtang sa laing bahin, gibasura sa mga lider sa House Quad Comm nga “bakak” ang mga alegasyon nga gipugos nila ang usa ka opisyal sa kapulisan nga suportahan ang testimonya kabahin sa kontrobersyal nga reward system sa war on drugs sa administrasyong Duterte.
Hugot nga gilimod ni Fernandez, ang chairperson sa House Committee on Public Order and Safety, nga ang pamahayag ni Grijaldo, gihulagway niini nga “lies of the highest level” ug nagtumong lamang nga gubaon ang imbestigasyon sa mega-panel sa sumala pa extrajudicial killings niadtong kampanya kontra iligal nga droga ni Duterte.
Gipunto sa opisyal nga wala gipugos sa komite si Grijaldo nga suportahan ang unsa man nga mga pahayag ug kabahin lamang ang maung lakang sa mas halapad nga pagpaningkamot nga mangayo og hustisya alang sa libuan ka mga kinabuhi nga nahanaw sa drug war ni Duterte.
Samtang hugot sab nga gikondena ug gikontra ni Manila’s 6th District Rep. Bienvenido Abante ang pahayag ni Grijaldo.
