Balik na sa pisikal nga pagtungha ang mga estudyante sa Jose Maria College Foundation Inc. sulod sa KOJC compound sa Catitipan ning dakbayan sa Davao.
Human sa kapin duha ka semana nga pagkabalda sa face-to face class, mibalik na kaganihang buntag ang pagtungha sa mga tinun-an.
Una ng naapektuhan ang pisikal nga klase sa nasampit nga tunghaan gumikan sa gihimong operasyon sa kapulisan tungod sa pagpangita ngadto kang Pastor Apollo Quiboloy gumikan sa warrant of arrest nga gipaguwa sa duha ka mga korte gumikan sa mga patong-patong nga kaso.
Nibati sab ug tumang kalipay ug kahapsay sa ilahang kaugalingon ang mga ginikanan ug mga estudyante sa pagbalik sa pisikal nga klase.
Atol sab sa ilahang pagbalik sa klase arong adlawa, nagpahigayon sab kini ug kulminasyon sa selebrasyon sa Buwan ng Wika.
Kahinumduman nga una ng gibutyag ni Atty.Dina Tolentino-Fuentes atol sa senate hearing nga gipahigayon sa SP building dinhi sa syudad nga dunay 6000 sumala pa ang naapektuhan nga tinun-an atol sa maong operasyon nga maoy hinundan nga mihangyo kini ngadto kang PBGEN. Nicolas Torre III nga moundang na sa ilahang operasyon.
