Nagduda ang usa ka kongresista nga gigamit lamang ni Vice President Sara Duterte ang isyu sa pagpakunhod sa ihap sa iyahang security escort, aron mawagtang ang atensyon sa publiko sa personal nga byahe niini sa Germany bisan paman nga adunay bagyong Carina niadtong milabay nga semana.
Dili motuo si Manila Rep. Joel Chua nga adunay kolor politika ang pagpakunhod sa police escort ni Duterte.
Gipahayag pa sa magbabalaod nga gihimo lamang sa kapulisan ang ilang trabaho ug unta respituhon ang gitrabaho sa kapulisan.
Giinsakto usab sa magbabalaod ang sayop nga pagtuo nga wala nay security escort ang bise presidente gumikan kay nagbaton pa gihapon kini ug mukabat sa 355 security personnel bisan paman nga gikuhaan kini 75 ka mga police escorts.
Samtang kung kahinumduman, si kanhi Vice President Leni Robredo ang nagbaton lamang ug 75 ka mga security personnel bisan paman nga dili kini kaalyado ni kanhi Pangulong Rodrigo Duterte.
