Mipasaka na ang Office of the Solicitor General ug quo warranto petition batok kang suspended Bamban, Tarlac Mayor Alice Guo nga mamahimong muresulta sa hingpit nga pagkatanggal sa posisyon sa gobyerno.
Sa petisyon nga gipasaka sa Manila Regional Trial Court, makita sa unang pahina ang nakabutang nga respondent si Guo Hua Ping a.k.a Alice Leal Guo.
Samtang kung kahinumduman, unang gikumperma sa National Bureau of Investigation nga si Guo ug ang Chinese passport holder nga si Guo Hua Ping ang adunay susamang fingerprints nga nagpakita nga usa ka tawo lamang ang mga nahisgutan.
Niadtong unang bahin sa Hulyo, nagpasaka ang OSG ug petisyon nga nangayo sa pagkanselar sa birth certificate ni Guo.
Unang gipahayag ni Solicitor General Menardo Guevarra nga sa higayong kanselahon kini, mawad-an ug importanteng depensang gihuptan ang suspendidong opisyal nga adunay kalabutan sa pagkatawo niini.
Samtang sa kabahin usab ni Guo, pipila kahigayon niining gipanghimakak ang mga alegasyon batok kaniya nga milambigit sa iyaha sa girondang POGO hub sa ilahang lugar sa Bamban nga nalambigit sa mga iligal nga operasyon.
