Migahin na ang Department of Agriculture ug P350 million nga magamit sa pagpamalit ug mga bakuna batok sa African swine fever (ASF).
Kini gumikan sa hingpit na nga pag-apruba sa Food and Drug and Administration (FDA) sa pagbakuna sa mga baboy ubos sa controlled vaccination o limitadong pagbakuna.
Ubos sa kamando-an sa FDA, gikanayon ni Agriculture Assistant Secretary and spokesman Arnel de Mesa, ang DA mao ang mupalit sa mga bakuna pinaagi sa Bureau of Animal Industry, usa ka unit sa nahisgutang ahensya.
Dugang pa niini, mamahimong pag-abot sa bulan sa Septyembre, available na ang bakuna dungan sa duha ka bulan nga gilaumang abuton sa procurement process.
Apan bisan paman niini, giklaro usab sa opisyal nga ang mga bakuna ang dili pa ipailalom sa commercial distribution gumikan kay limitado pa lamang kini.
Sa kasamtangan, daghang probinsya pa gihapon sa Pilipinas ang wala pa nalimpyuhan gikan sa unang epekto sa ASF sukad nga midagsa ang makamatay nga sakit sa mga baboy.
Sukad 2019 unang nadeskubrehan ang presensya sa ASF sa mga baboyan sa Pilipinas ug gibanabanaang mukabat na sa 5 milyon ka mga baboy ang gipamatay aron malikayan ang pagkuyanap sa virus.
