Gibasol sa China ang Pilipinas sa nahitabo sa Ayungin shoal niadtong Hunyo 17 ning tuiga nga miresulta sa kadaot sa mga kagamitan sa naval sa Pilipinas ug pagkaangol sa pipila ka mga personahe sa Navy lakip na ni Seaman First Class Jeffrey Facundo nga naputlan og kumagko.
Matod ni Chinese Foreign Affairs Ministry Spokesperson Mao Ning, nga daw kinahanglang atubangon sa Pilipinas ang mga sangpotanan sa ilang kaugalingong mga aksyon.
Ang opisyal sa China mihimo sa pamahayag human ang Armed Forces sa Pilipinas, nga nagpahigayon og resupply ug rotation mission sa BRP Sierra Madre outpost sa Ayungin shoal, nangayo og P60 milyon nga bayad sa danyos nga naangkon sa habig sa PH sa maong insidente.
Hinuon, ang opisyal sa China wala motubag kung bayran ba o dili ang maong kantidad.
Gitataw hinuon ni Mao ang pangangkon sa China sa Ayungin shoal nga giingong nagpahigayon ang Pilipinas og illegal resupply missions sa BRP Sierra Madre nga supak sa ilang territorial waters ug nagpasiugda usab og provocation sa dihang gibabagan kini sa Chinese Coast Guard nga giingong lehitimong gidepensahan ang soberanya sa ilang nasud.
Apan, ang Department of Foreign Affairs (DFA) una nang niingon nga ang Ayungin shoal kay 423.30 nautical miles gikan sa Paracels ug 617.39 nautical miles gikan sa Chinese mainland, busa klaro nga lapas pa kini sa 200 nautical miles maximum nga makonsiderar nga ilang property o sulod sa ilang exclusive economic zone ubos sa UNCLOS.
Busa wala’y lehitimong katungod ang China nga iduso ang iyang soberanya sa maong shoal.
