Gipaneguro sa pamonuan sa Armed Forces of the Philippines (AFP) nga andam makigsangka ang Pilipinas sa mga mosulay nga sakupon ang teritoryo sa nasud.
Kini ang giluwatang pamahayag ni AFP Chief of Staff General Romeo Brawner sa padayong giatubang nga hagit sa Pilipinas batok sa China partikular na ang isyu sa West Philippine Sea (WPS).
Gikanayon pa niini nga gumikan sa modernisasyon sa AFP, halayo na ang naabtan sa nasud sa hisgutanang depensa. Gipahayag pa sa AFP Chief, kung adunay gustong musakop sa Pilipinas, makigsangka kita ug seguradong adunay masamdan sa mga mosulay nga mo-ilog sa nasud.
Gipasabot pa niini ang mas kusog nga katakus sa pangdepensa sa nasud gumikan na usab sa pagbaton ug mga bag-ong kagamitan nga giaprubahan ni Pangulong Ferdinand Marcos Jr.
Dako ang pondo nga gigahin sa gobyerno alang sa ikatulong hugna sa modernisasyon sa AFP o ang horizon 3 alang sa comprehensive archipelagic defense concept.
Nakalinya usab ang mas daghan pang barko o corvets nga mas nailang warships lakip na ang jet fighters nga paliton.
Gipasegarbo usab niini nga ubos sa modernisasyon, nagbaton na ang nasud ug radar defense system, surveillance system ug ang bag-uhay naabot nga missile system nga makakaya sa pagpaunlod ug barko.
Bisan ang katakus sa mga sundalo ang nag-level up na usab gumikan kay gibansay-bansay ang mga nahisgutan sa cyber warfare aron sila ang mahimong cyber warriors.
Nahilakip usab sa training ang pagmugna ug mga bag-ong organisasyon susama sa missile regiments ug cyber command.
