DAVAO DEL NORTE- Mikabat na ngadto sa 150 milyon pesos matag tuig ang nahimong economic loss sa Island Garden City Of Samal gumikan sa nagpabiling problema sa kuryente sa nasampit nga isla.
Sumala pa ni Island Garden City of Samal Mayor Al David Uy nga nagpabilin pa gihapong dakong hagit ngadto kanila ang problema sa kuryente kung diin halos taga adlaw gayud ang nasinatiang brownout sa mga lumulopyo sa maong probinsya.
Dugang pa sa maong opisyal nga bisan paman aduna na silay dagkong mga generator set dili gihapon kini “enough” arun nga matubag ang maong problema.
Kahinumduman, mipasaad usab ang maong mayor nga andam ang ilahang lokal nga panggamhanan arun nga mamahimong mediator sa Davao Light and Power Company (DLPC) ug Northern Davao Electric Cooperative (NORDECO) arun nga pagaistoryahan ang mamahimong pinakamaayong lakang arun usab nga matuldukan na ang nagkagrabeng problema sa kuryente sa maong naasoy nga dapit.
Matud pa sa maonng opisyal na dili lamang mga pang adlaw-adlaw nga kinabuhi sa mga Sama ang naapektuhan kundi lakip na usab ang turismo, lokalidad ug ang kinatibuk-ang ekonomiya sa maong Isla.
Sumala pa nga daghanang mga investors ang gaduhaduha og sulod ingon man invest sa ilahang Isla gumikan na lagi usab sa problema sa kuryente.
Una ng gikabalak-an sa lokal nga panggamhanan sa Island Garden City of Samal nga posibleng mulungtad pa hangtod Hunyo sa sunod nga tuig ang pagpailawom sa state of calamity gumikan gihapon sa problema sa suplay sa kuryente sa maong Isla.
Kahinumduman nga niadtong Mayo sa miaging tuig gideklara ang state of calamity sa isla gumikan sa kadako nga problema sa suplay sa kuryente hangtod niadtong Pebrero ning kasamtangang tuig.
Busa panawagan nila ngadto sa Davao Light and Power Company (DLPC) ug Northern Davao Electric Cooperative (NORDECO) nga magsabot ug sakto ug tarung alang sa hiniusang tumong nga matabangan ang ilahang dakbayan sa pagresolba sa maong problema.
