DAVAO CITY – Gikompirmar sa Department of Public Works and Highways 11 (DPWH 11) nga gi-account na ang matag putlon sa kahoy alang sa pagtukod sa Samal Island-Davao City (SIDC) Connector Project.
Sumala sa ahensya, nipatuman ang Department of Environment and Natural Resources (DENR) og mga safeguards, lakip na ang Environmental Compliance Certificate (ECC) nga nagkinahanglan nga pulihan og 100 ka punoan ang matag putlon sa kahoy.
Gitugyan ngadto sa DENR ang mga seedlings sa mga kahoy, kinsa nag-apod-apod niini ngadto sa giila nga mga komunidad alang sa pagtanum.
Kini taliwa sa kabalaka sa usa ka environmental group sa Davao City nga gihimo sa sayop nga panahon ang pagpamutol sa mga kahoy sa Lanang alang sa pagtukod sa SIDC project.
Hinuon, mipasalig ang tigpamaba sa DPWH 11 nga si Dean Ortiz nga gipailawom sa konsultasyon ang pagpamutol sa mga kahoy ug makatubag sa mga protesta ang DENR.
Nagpadayon ang pagtrabaho alang sa SIDC Project bisan pa sa mga isyu sa right-of-way (ROW) sa bahin sa Davao City. 25% ang nahimo sa DPWH alang sa ROW acquisition, diin 14 sa 55 ka apektadong lote sa Davao City ang nakuha na ubos sa negotiated sale.
Apan, upat sa unom ka lote sa Davao side ug 100% sa mga luna sa Samal side ang expropriated na sa gobyerno.
