DAVAO CITY – Gibutyag ni Kingdom of Jesus Christ leader Apollo Quiboloy atol sa talagsaong pagpakita nini sa usa ka interview kauban si Former President Rodrigo Duterte, ang hinungdan sa pagtuboy sa kanhi pangulo sa mga propriedad nga gipanagiyahan ni Quiboloy.
Pagbutyag sa televangelist, dagko ang utang kabubut-on niya kang Duterte gumikan sa pagpatunga niini sa mga isyu sa gipanag-iyahan niyang mga luna dihang giusig kini sa gobyerno sa pipila ka tuig na ang milabay.
Sumala pa, sa panahon sa pagka-Mayor ni Duterte sa Davao City, gikatakda unta nga walaon ang 30 ektarya nga yuta nga gikahimutangan sa kasamtangang Kingdom of Jesus Christ Compound ning dakbayan sa panahon ni Former President Joseph Estrada, apan gibabagan kini ni Duterte.
Nademanda sab kaniadto si Quibuloy og illegal coversion of land gumikan sa pagbaton og luna sa may Prayer Mountain sa may Tamayong, Calinan diin gibaktas ni Duterte ang maong luna aron makahinabi pa ang mga lumad nga nahumuyo sa maong dapit aron makigsabot kanila lakip na ang mga rebeldeng myembro sa New People’s Army.
Sumala ni Quibuloy, nahimo nang suod nga tigpanalipod si Duterte alang kang Quibuloy sa daghanang higayon busa gipasalig na lamang kaniya ang pagprotekta sa mga kayutaan sa church leader dungan sa pag-volunteer ni Duterte isip property administrator sa KOJC.
Kahinumdoman nga nakugang ang tibuok nasud sa pagbalik ni Quibuloy human nigawas ang litrato sa usa ka vlogger nga uban nila ni Duterte ug Quibuloy karong bag-uhay lamang.
Sa laing bahin, gikataho nga mipadayag si Quibuloy og pipila ka mga kondisyon sa wala pa mosugot nga moatubang sa Senado, diin gikapalag kini ug wala motuman niini si Senador Risa Hontiveros.
Matod sa senador, dili gayud kini motuman sa mga kondisyon nga gitakda sa church leader una pa nga motunga sa Senate Hearing.
Gipalsipikar dayon sa legal team ni Quiboloy ang maong mga kondisyon alang sa Senado.
via || Bombo LJF
