DAVAO CITY – Kumpirmadong kabsan sa kinabuhi ang usa ka 5 anyos nga bata samtang nagpaalim sa Southern Philippines Medical Center ang duha ka indibidwal human nagbangga ang kotse ug motorsiklo gikan sa pagpangampanya pasado alas-10 sa buntag, Sabado, Oktubre 21, sa may Prk. 17, Promise Land, Bunawan, Davao City.
Sumala sa imbestigasyon sa Bunawan Police, aksidenteng nabanggaan sa usa ka Honda Fit nga sakyanan ang motorsiklo rason nga nadaro kini ug nadamay pa ang tulo ka mga indibidwal lakip na didto ang usa ka bata.
Giila ang 5-anyos nga biktimang si Mariechan Intapaya. Samtang giila sab ang mga biktima nga sila Andrew Tamsi, driver sa motor, 25-anyos; ug Shiella Mae Casimsiman, 25-anyos.
Samtang gipasakahan na og kasong Reckless Imprudence Resulting to Serious Physical injury and Damage Property ang drayber sa Honda Fit nga nakaligis sa mga biktima nga si Geovani Marchan, 41-anyos, nga padlak na sa Bunawan Police Station.
Nasayran nga dungan nga nangampanya ang nasangpit nga mga indibidwal kauban ni Brgy. Bunawan Proper Chairman Ronnie Odeña nga nagpahigayon og motorcade sa maong lugar dihang nahitabo ang aksidente.
Giabaga na sa ilang team ang galastuson sa pagpaalim sa duha ka biktima ug pagpalubong sa 5 anyos nga bata.
