DAVAO CITY – Giumol sa Davao City Police Office ang usa ka special team alang sa pag-imbestiga sa kamatayon sa 57-anyos nga si Lilian Del Campo Nieva nga kahinumdumang gitulis ug brutal nga gipatay sa sulod sa iyang balay sa Phase 1, Block 101, Lot 3, Deca Homes Talomo, Brgy. Bago Galera, ning nilabayng simana.
Sumala sa DCPO, pagatawgon kining Task Force Oplan Siyasat diin manguna niini si DCPO Director Col. Alberto Lupaz ug piling mga sakop sa Criminal Investigation and Detection Group XI ug Regional Anti-Cyber Crime Unit XI.
Gikumpirma mismo sa tigpamaba nga si Police Captain Hazel Tuazon nga aduna na silay lead sa usa ka suspek apan nagdumili sa pagbutyag sa dugang mga detalye aron dili makompromiso ang imbestigasyon.
Una nang gibutyag ni PMaj. Romeo Mapanao, Jr., ang hepe sa Baliok Police Station nga dagkong hagit karon sa ilang buhatan ang pag-imbestiga sa maong krimen gumikan na sab nga walay CCTV gawas sa panimalay sa biktima, ingon man saksi sa maong insidente ug wala usab timailhan nga dunay “force entry” gumikan walay timailhan nga naguba ang mga bintana ug main door sa balay ni Nieva.
Nagatoo usab si Mapanao ng posibleng anaa sa 1-2 ka mga suspek ang mibuhat sa maong krimen. Nasayrang walay kauban sa balay ang biktima gumikan wala kini anak ug bulag na matud pa usab kini sa iyang bana diin anaa kini karon sa Estados Unidos.
Gikatakdang ipresenta karong adlawa, Martes, Oktubre 3, ang resulta sa imbestigasyon.
Hingpit nga gikondena ni kanhi chairman sa Philippine Sports Commission ug kanhi niyang kaubanan nga si William ‘Butch’ Ramirez ang kamatayon ni Nieva ug personal sab nga niadto sa iyang haya sa usa ka punerarya ning dakbayan.
