DAVAO CITY – Gipaneguro sa Davao City Water District kon DCWD ang igo nga suplay sa tubig bisan pa man sa hulga sa El Niño sa rehiyon.
Matod sa tigpamaba sa DCWD nga si Jovana Duhaylungsod, dili maapektuhan ang suplay sa tubig sa Davao City tungod kay kasagaran sa mga watershed niini ang underground based ug nasa positive balance ang watershed sa Talomo, Lipadas ug Sibulan.
Apan giklaro ni Duhaylungsod, posible gihapon nga makaapekto ang El Niño apan nihit lang ang mamahimong epekto niini.
Taliwala pa man niana, nangandam gihapon ang DCWD sa El Niño gumikan sa gikatalang pagsaka sa demand sa tubig sa mga kabalayan nga giserbisyuhan sa DCWD.
Kahinumduman nga unang niluwat og pamahayag ang Pag-asa niadtong Mayo nga posibleng masinati sa nasud ang El Niño gikan sa Hunyo 2023 hangtod sa unang quarter sa 2024.
via || Bombo LJF
