DAVAO CITY – Nakabsan sa kinabuhi ang usa ka mananagat human kini naigo sa kilat pasado alas 11:45 kagabie, samtang nanagat sa kadagatang bahin sa usa ka resort sa lanang, ning dakbayan sa Dabaw.
Giila ang biktima nga si Sofronio Pal Taneo, 65 anyos, mananagat , ug residente sa Sitio Bolakan, Brgy. Aquino Agdao, Davao City kinsa lumad usab gikan sa Brgy. Site Manual, Kiblawan, Davao Del Sur.
Subay sa inisyal nga imbestigasyon, sumala sa usa ka witness nga si Armand Alcociba Adriano, 32 anyos, minyo, usa ka driver ug residente sa Lizada Lanang ning dakbayan sa Dabaw.
Samtang anaa matod pa siya sa iyang panimalay duol sa maong resort , nakita niya ang biktima nga direktang naigo sa kilat, hinungdan nga gitawag niini ang iyang igsoon nga lalaki ug higala aron tabangan ang biktima nga mahaw-as gikan sa kadagatan.
Gisuwayan pa og tabang ang biktima pinaagi sa CPR, apan pakyas nilang nasalbar ang kinabuhi sa biktima.
Gitinguha usab og rekober sa mga awtoridad ang biktima apan hingpit na gayud kining nakabsan sa iyang kinabuhi. Ning kasamtangan, nahimutang ang patay’ng lawas sa biktima sa Rivera Funeral Homes sa Sasa, Davao City alang sa tukmang disposisyon.
