DAVAO CITY – Gikalipay sa lokal nga panggamhanan sa Davao del Norte ang pagbalik sa pipila ka mga lumad nga gikatahong nagtago gumikan sa paggamit sa mga komunistang grupo kanila.
Mainitong gidawat ni Davao del Norte Governor Edwin Jubahib ang ang secretary-general sa Pasakkaday Salugpongan Kalimuddan kon PASAKA nga si Datu Tungig Mansumuy-at, kuyog pa ang laing 12 niya ka mga kauban, human ang pila ka bulan nga pagtago-tago pagbiya nila sa maong pasilidad.
Si Datu Tungig ang ulahing tribal leader nga nagpabilin sa UCCP-Haran nga gikatahong nagtago sukad 2015. Sa usa ka press conference, gipresentar sa gobernador uban ang 1003rd Infantry Batallion Commander Col. Marion Angcao sa mga miyembro sa media si Mansumuy-at, nga misurender sa militar niadtong Marso 14, 2023.
Gikanayon ni Col. Angcao nga si Datu Tungig ang nangumbinsi aron palugsungon sa Davao City ang mga tribo sa mga lungsod sa Kapalong ug Talaingod, Davao Del Norte aron magsilbing bakwit sa Haran, sa pasangil nga tungod kuno sa military operation sa kabukiran.
Butyag ni Mansumuy-at nga naalanganin siya sa pagtahan niadtong una, apan nausab ang iyang huna-huna sa iyang nakita nga dakong kausaban sa kinabuhi sa iyang mga kaubang bakwit sa Haran nga nauna nang miuli sa ilang tagsa ka mga komunidad.
Misaad siya nga motabang sa kampanya sa gobyerno alang sa kalinaw ug kalamboan, human niya pasalamatan ang 1003rd Infantry Brigade ug 56th Infantry Battalion sa paghatag kanila og mga panginahanglan og kaluwasan sa ilang mga pamilya.
via || Bombo LJF
