DAVAO CITY – Malampusong nasikop sa Kiblawan Municipal Police Station ug Davao Del Sur Provincial Police Office ang most wanted nga kriminal nga lider sa usa sa notoryus nga sindikato sa probinsya.
Giila ang maong personalidad nga si Jolito Cansing alyas “Lolong”, usa ka netibong B’laan nga nagpuyo sa Brgy. Kimlawis, Kiblawan, Davao Del Sur kinsa adunay kaso nga kidnapping ug frustrated murder.
Sumala pa ni DDSPPO Director Police Col. Giuseppe Geralde, nalambigit si Cansing sa mga serye sa pagpanghulga sa mga mag-uuma sa Kiblawan. Gitudlo si Cansing nga lider sa 24 ka mga notadong kriminal nga nag-operate sa Kiblawan.
Gumikan niini, hiniusang naglusad og Oplan Cancing ang mga otoridad sa probinsya sulod sa halos 2 ka simana nga pagpaniid sa mga kalihukan sa grupo ni Cansing.
Nagresulta kini sa pagkasikop sa 24 ka mga bandido nga myembro sa grupo ni Cansing diin dunay patung patong nga warrant of arrest.
Atol sa operasyon sa miaging adlaw, upat ka homemade shotgun, armas ug mga bala, lakip na ang kapin bayte mil nga kantidad sa buhing tanom nga marijuana ang nasakmit gikan sa posisyon sa dinakpan.
Sa pagkakaron, adunay usa lamang ka organized crime group nga naglihok gihapon sa Kiblawan ug padayon nga gibantayan ug gisubay sa mga law enforcement agencies.
via || Bombo LJF
