DAVAO CITY – Gikabalak-an sa usa ka opisyal sa MARINA nga mag-atubang og dagkong problema ang mga Filipino seafarers kon dili ilhon sa European standards ang credentials sa mga Pilipinong marino.
Gikanayon ni Dr. Liza Orongan, regional director sa Maritime Industry Authority kon MARINA nga nag-atubang karon og suliran ang anaa sa singkwenta mil ka mga manlalayag gumikan sa matud pa bagsak nga rating nga gihatag sa European Maritime Safety Adminitration kon EMSA.
Gipaklaro ni Orongan nga pasado ang mga Pilipinong marino sa Standards of Training, Certification and Watchkeeping kon STCW dinhi sa nasud, apan sumala pa sa nahimong final audit sa EMSA, napakyas ang Pilipinas sa pag-abot sa gihatag nila nga mga sumbanan.
Gumikan niana, pagbutyag ni Orongan, delikado ang mamahimong kahimtang sa mga Pilipinong marino tungod anaa sa desisyon sa European Commission kon ikonsidera nila ang nabatunang mga STCW certificates dinhi sa Pilipinas.
Nagsumitar na sa corrective measures ang MARINA ngadto sa EMSA ug kasamtangan pang ginahulat ang mando gikan sa maong international accrediting agency.
Taliwala niana, gipanaad sa MARINA nga tabangan gihapon ang mga tripulate nga makalayag sa mga kadagatan taliwala sa kwestyonableng paghukom kanila sa EMSA.
via || Bombo LJF
